Gjatë raportimit të ministres së Industrisë, Ndërmarrësisë dhe Tregtisë, Rozeta Hajdari, në Komisionin për Ekonomi, pati përplasje mes deputetëve të pozitës dhe opozitës për importet e mallrave nga Serbia. Këta të fundit madje lëshuan sallën.
Gjatë diskutimit të Ligjit për tregti me jashtë, përplasja ndodhi për shkak të deklaratës së deputetit nga AAK, Pal Lekaj, i cili akuzoi mazhorancën se ka “lulëzim” të importit në Kosovë nga Serbia.
Për këtë deklaratë pati reagime nga deputetët e partisë në pushtet.
Deputeti Driton Hyseni ka akuzuar Lekajn për dezinformim të publikut, derisa ka kundërshtuar deklaratën e tij, ai tha se importi me Serbinë nga 25 për qind ka shënuar në 6 për qind me Qeverinë Kurti.
Po ashtu, kritika për këtë deklaratë pati edhe shefja e Grupit parlamentar të LVV-së, Mimoza Kusari Lila, e cila kërkoi nga deputeti Lekaj që të kërkojë falje dhe t’i shikojë statistikat e ASK-së.
Për këtë, ministrja Rozeta Hajdari është shprehur e befasuar me zërin e lartë të deputetit Lekaj.
Ndërsa, deputetja e LDK, Valentina Bunjaku – Rexhepi, kërkoi që ministrja Hajdari të përgjigjet në pyetje konkrete e të mos i komentojë zërat e deputetëve.
Ndërkaq, deputeti nga PDK, Ferat Shala, ka adresuar disa pyetje karshi ministres Hajdari për strategjinë për hulumtim dhe zhvillim. I njëjti ka kërkuar të dijë edhe për ekspertin që ka marr 1 mijë euro në ditë për hartimin e kësaj strategjie.
Për këtë, Hajdari tha se nuk mban mend emrin e ekspertit.
Mes tjerash, Hajdari duke folur për Ligjin për tregti të jashtme, ka theksuar se ky ligj përcakton parimet dhe rregullat e përgjithshme të importit, eksportit dhe për ushtrimin e tregtisë me jashtë, duke shtuar se ka ndikime statistikore në përmirësim të bilancit tregtar që ishte para 3 viteve në 1 me 10, ndërsa tash është 1 me 6.
Në këtë drejtim, ajo shtoi se vështirësi ka në CEFTA, në paraqitjen e shtetit të Kosovës në mënyrë të barabartë./ KP