Autoritetet meksikane janë në kërkim të personave të armatosur të cilët kanë vrarë të paktën 12 persona dhe kanë plagosur tre të tjerë pasi kanë hapur zjarr në një bar në Meksikën qendrore të shtunën e 15 tetorit në mbrëmje.
Të shtëna me armë zjarri janë raportuar në një lokal në qytetin e Irapuato në shtetin qendror të Guanajuato në afërsi të orës 20:00 me orën lokale të shtunën, ka thënë në një deklaratë sekretari i qytetit për Sigurinë e Qytetarëve.
Mjekët kanë konfirmuar vdekjen e gjashtë burrave dhe gjashtë grave pasi kanë mbërritur në vendngjarje, sipas deklaratës. Por nuk dihet se kush janë viktimat dhe sa persona të armatosur janë përfshirë në të shtënat.
Kjo është vrasja e dytë masive në më pak se një muaj në shtetin e Guanajuato, i cili është tronditur vitet e fundit nga luftërat brutale në terren midis bandave rivale të drogës.
Presidenti Andres Manuel Lopez Obrador ka luftuar për t’u marrë me dhunën e bandave qëkur ka marrë detyrën në fund të vitit 2018, raporton CNN.
Edhe pse numri i vrasjeve ka rënë paksa këtë vit, mandati i Lopez Obrador është caktuar të jetë më i përgjakshmi në historinë e fundit.