Komisioni Qendror i Zgjedhjeve (KQZ) ka pezulluar Partinë Sociale Demokrate (PSD) për shkak të mos mbajtjes së kuvendeve zgjedhore brenda afatit ligjor.
Këtë vendim, kryetari i PSD-së, Dardan Molliqaj, në një postim në rrjetin social Facebook, e ka konsideruar si një dashakeqësi ndaj partisë së tij.
Molliqaj ka theksuar se PSD ka thirrur Kuvendin e saj, duke respektuar të gjitha procedurat dhe ka njoftuar KQZ-në për këtë ngjarje.
Ai vendimin e ka konsideruar si një qasje formaliste dhe shantazhuese, e cila, sipas tij, është e dëmshme për organizimin politik.
“PSD tashmë e ka thirrur Kuvendin e saj, konform të gjitha procedurave, me datën 28 janar dhe për këtë gjë e kemi njoftuar KQZ-në. Prandaj, procedimin me pezullim nuk mund ta shohim ndryshe pos si dashakeqësi ndaj PSD-së. Një qasje e tillë formaliste e shantazhuese është e dëmshme për organizimin politik dhe s’duhet të pranohet në asnjë mënyrë”, ka shkruar Molliqaj në Facebook.
Përveç saj, KQZ-ja ka pezulluar edhe Partinë për Bashkëveprim, për shkak se këto dy parti nuk kanë mbajtur kuvendet e tyre zgjedhore sipas afatit ligjor.
Afati i fundit për mbajtjen e kuvendit/konventës zgjedhore për partinë politike, “Partia për Bashkëveprim” ka qenë data 8 dhjetor 2023, ndërsa për partinë politike, “Partia Socialdemokrate” ky afat ka qenë më 15 dhjetor 2023.
Sipas vendimit të KQZ-së, këto dy parti politike obligohen që të mbajnë kuvendin e tyre zgjedhor në një afat shtesë prej 45 ditësh, dhe nëse kjo nuk arrihet, atëherë sipas Rregullores për regjistrimin dhe funksionimin e partive politike, KQZ-ja merr vendim për çregjistrim nga regjistri i partive politike në Kosovë.