Fatmir Plakiqi, Drejtori i Fondit për Sigurime Shëndetësore i ka cilësuar si tendencioze raportimet e disa mediumeve për keqpërdorime në fond.
Plakiqi gjatë raportimit para Komisionit për Shëndetësi dhe Mirëqenie Sociale, ka thënë se të gjitha këto spekulime do t’i dërgojë në Polici dhe Prokurori këtë të premte.
Gjatë raportimit, Drejtori i Fondit për Sigurime Shëndetësore ka thënë se kanë filluar sulmet, të cilat përkojnë me kohën prej kur është propozuar ndryshimi i udhëzimit administrativ e tutje.
“Të gjitha këto spekulime të premten do t’i dërgoj në Polici e Prokurori. Kjo është arsyeja pse nuk kam dalë në publik. Krejt informatat janë tendencioze. Ka pasur lloj-lloj informata që janë plasuar. Por, janë organet e hetuesisë që të premten do t’ua dorëzoj dosjen”, ka deklaruar Plakiqi.
Plakiqi ka treguar se deri më tani kanë barazuar 44 institucione shëndetësore dhe shuma e fondeve të pashfrytëzuara është 1.4 milion. Ai ka rrëfyer se janë në fazën e barazimit me 48 institucionet në Maqedoni të Veriut dhe Turqi.