Kryeministri i Kosovës, Albin Kurti ka treguar se në momentin e rrëmbimit, tre policët shqiptarë kanë qenë te tryeza e improvizuar për ngrënie, e cila ishte 7 metra prej veturës së policisë, kur janë rrethuar nga 15 persona që i kanë sulmuar dhe i kanë rrëmbyer.
Kurti ka thënë se nga vizita e ambasadorit të Kosovës në Beograd, Jetish Jashari, rrëfimet e policëve janë “identike”.
“Ne jemi në të drejtën tonë, në të drejtën e Republikës dhe këtë e dokumentojnë qartë dëshmitë që posedojnë institucionet tona të sigurisë, si dhe dëshmia e tre policëve tanë. Kërkojmë lirimin e menjëhershëm të tre zyrtarëve policor. Ata duhet të lirohen pa kushte dhe të pacenuar”, ka shtuar tutje Kurti.
Kreu i ekzekutivit ka kërkuar nga faktorët ndërkombëtarë, Bashkimi Evropian, Shtetet e Bashkuara të Amerikës dhe NATO-ja që ta dënojnë agresionin e Serbisë.