Prokuroria Speciale e Republikës së Kosovës (PSRK) dhe Policia e Kosovës (PK) kanë njoftuar se në vazhdën e parandalimit të aktiviteteve kriminale, Policia e Kosovës, respektivisht njësitet relevante, sot kanë zbatuar urdhërkontroll në pjesën veriore të vendit.
Prokuroria Speciale ka njoftuar se me urdhër të gjykatës, Policia e Kosovës ka zhvilluar kontrolle në shtatë lokacione në pjesën veriore të vendit, që lidhen me ngjarjet e 24 shtatorit 2023, respektivisht sulmin terrorist ndaj Policisë së Kosovës në Banjskë.
“Po ashtu, ju njoftojmë se kontrollet janë kryer në lokacione të ndryshme, katër në Mitrovicën e Veriut, dy në Zveçan dhe një në Banjskë. Gjatë këtyre kontrolleve, në një podrum të njërit nga tre soliterët në Mitrovicën e Veriut, janë gjetur një sasi municioni, kallashnikovë, zola, eksploziv etj. Pjesëmarrës në këto kontrolle ishin edhe zyrtarë nga EULEX-i, kurse te “Tre rrokaqiejt” prezent kanë qenë edhe EOD -KFOR-i, po ashtu EOD e Policisë së Kosovës është në vend të ngjarjes”, thuhet në komunikatën për media.
Sipas njoftimit të tyre, lista preliminare e armëve dhe pajisjeve tjera të sekuestruara është: 87 copë eksploziv të tipit TM 100, 3 granata hedhës dore (zola), 1 armë automatike AK-47, 1 minë kundër këmbësorisë e tipit MRUD, 14 karikatorë, municion të kalibrave të ndryshëm, 63 detonatorë elektrikë, 23 detonatorë mekanikë, 1 orë për aktivizim, 1 granatë dore M79, 3 tuba fitila ndezës, çanta, radiolidhje, antiplumba, pajisje medicionale, gyksore (jelek për bartje të karikatorëve), maskë kundër gazit, bateri e të tjerë.