Beteja e Banjskës ende nuk ka përfunduar.
Sulmi terrorist u zmbraps, e tash po kërkohen rrënjët e tij nëpër komunat veriore.
Detajet e planit po i marrin në stacion policor në Jug, ndërsa tash po bëhen gati të nisen për në destinacion. Anti-plumbat në trup, helmetat në kokë, armën e gjatë në krahë, të gatshëm për bastisjet e radhës, plot 13 sosh.
Lokacioni është 35 kilometra më larg.
Kolonës i prijnë njësitë speciale të Policisë së Kosovës, ndërsa prapa u janë bashkuar edhe pjesëtarët e EULEX-it.
Rruga për në Leposaviq është malore, e kushtet atmosferike jo fort të favorshme.
Tash po i afrohemi qytetit.
Perimetri sigurohet e bastisja fillon sipas planit.
Për shkak se është zonë e banueshme kërkohet më shumë vëmendje. Çdo cep i lagjes po monitorohet nga specialët.
Shtëpia që po bastiset është mbuluar pothuajse në çdo pjesë nga kamerat.
Sipas mediave lokale serbe ajo i përket familjes Jevremoviq. Ajo thuhet ka në pronësi edhe një bujtinë dhe një kafene në qendër të Leposaviqit, si dhe kultivojnë boronica.
Kjo familje posedon prona edhe në fshatin e afërt Trikos. Edhe aty, sipas këtyre mediave është kryer bastisje nga Policia.
Për të gjetur atë që kërkonin u përdorën edhe shkallët në oborr, por ishte e pamundur të shihet se çka u gjet. Vigjilent u treguan edhe me vende tjera, përfshirë bunarin e ujit në oborr.
Kjo është kronologjia e bastisjes që zgjati më shumë se dy orë në Leposaviq. Nga aty u hetuesit dolën me dokumente në duar e plastika që shërbejnë për bartje të gjësendeve. Për asnjërën nuk u njoftua se çka përmbajnë.
Pos bastisjes në Leposaviq në mëngjes janë kryer aksione edhe në Mitrovicën Veriore.
Një ndër disa lokacionet në të cilat Policia e Kosovës ka kryer bastisje është këtu afër tre rrokaqiejve, por se çka është gjetur gjatë bastisjes, deri më tani nuk është bërë e ditur.
Njësitet Speciale zbarkuan edhe në afërsi të shkollës së mesme të mjekësisë.
Këtu prania e tyre u prit me interes nga banorët, e nga disa edhe më bërtitma e fyerje.
Nuk u kuptua cila është adresa, por në hyrje të ndërtesës është e vendosur kjo reklamë e biznesit të masazhës me emrin “Radovic”.
Këtu aksioni nuk zgjati më shumë se 30 minuta, e prapë nuk u kuptua çka u gjet.
“Nuk mund të konfirmoj se çka është gjetur, sepse kjo është pjesë e hetimeve, kur të përfundoj aksioni mund të tregojmë më shumë”, ka thënë zv.drejtori i Policisë për rajonin e Veriut, Veton Elshani.
Edhe pse aksioni përfundoi, sërish nuk u dhanë detaje për të gjeturat gjatë bastisjes, përpos se nuk ka të arrestuar.
Këto janë vetëm 3 nga 13 bastisjet të cilat Policia e Kosovës i ka kryer vetëm gjatë së martes.
Shtatë bastisje janë kryer në Mitrovicën Veriore, tri bastisje në Leposaviq dhe tri në Zveçan.