Gjatë të premtes, një 5-vjeçar ka vdekur në Spitalin e Vushtrrisë, si pasojë e lëndimeve që dyshohen të jenë nga arma e zjarrit.
Në raportin 24-orësh, Policia e Kosovës ka bërë të ditur se në vendin e ngjarjes është gjetur një predhë dhe një fishek, si dhe në një distancë nga 56 metra larg nga vendi i ngjarjes, është gjetur një armë, e cila është konfiskuar.
Policia ka bërë të ditur se rasti është ende duke u hetuar.
Zëdhënësi i Policisë së Kosovës për rajonin e Mitrovicës, Avni Zahiti, ka konfirmuar për Portalin Dukagjini se fëmija ishte dërguar për ndihmë mjekësore në Spitalin e Vushtrrisë.
“Rreth orës 17:20, është raportuar se në Spitalin e Vushtrrisë, një fëmijë i moshës 5-vjeçar është sjellë për ndihmë mjekësore, ndërkohë nga autoritetet mjekësore është bërë e ditur se si pasojë e lëndimeve që dyshohen të jenë nga arma e zjarrit, fëmija ka vdekur”, ka thënë Zahiti.
Nga hetimet fillestare bëhet e ditur se ngjarja ka ndodhur në oborrin e shtëpisë së fëmijës.
“Në vendin e ngjarjes është gjetur dhe sekuestruar një gëzhojë dhe një armë e llojit pistoletë. Me urdhër të prokurorit, trupi i pajetë i viktimës është dërguar për obduksionin në Institutin e Mjekësisë Ligjore. Rasti është iniciuar si ‘Vdekje e dyshimtë’”, ka deklaruar Zahiti.
Vdes një fëmijë 5-vjeçar në Vushtrri, dyshohet se është vrarë me armë zjarri