Drejtori i Përgjithshëm i Policisë së Shtetit, Drejtues Madhor Ilir Proda, ka marrë pjesë në Asamblenë e 93-të të Interpolit, e cila u mbajt në Marrakesh të Marokut dhe ku ishin të pranishëm drejtues policorë nga 196 shtete të botës.
Gjatë zhvillimeve të këtij aktiviteti ndërkombëtar, Proda, së bashku me Drejtuesin e Lartë Pëllumb Seferi dhe Drejtuesin Ulian Shpataraku, realizoi një sërë takimesh bilaterale me homologë të rëndësishëm, si me Drejtorin e Përgjithshëm të Sigurisë Publike Italiane, Prefektin Vittorio Pisani, si dhe me delegacionin turk të kryesuar nga zëvendësministri i Brendshëm, Munir Karaloglu.
Në këto takime u paraqit progresi i Policisë së Shtetit në luftën kundër krimit të organizuar, si edhe angazhimi i saj i plotë dhe i barabartë me partnerët ndërkombëtarë në operacione të përbashkëta. Delegacionet pjesëmarrëse vlerësuan profesionalizmin dhe besueshmërinë e Policisë shqiptare, duke theksuar se ajo është një partner serioz dhe i gatshëm për të zgjeruar bashkëpunimin në hetime ndërkufitare përmes skuadrave të përbashkëta hetimore.
Asambleja e 93-të e Interpolit u mbyll me zgjedhjen e Presidentit të ri, Lucas Philippe, si edhe të Zëvendëspresidentit për Azinë, delegatëve të rinj për Afrikën, Azinë dhe Evropën, si dhe anëtarëve të rinj të Komitetit Ekzekutiv, organ që merret me udhëzimet strategjike dhe mbikëqyrjen e vendimeve të Asamblesë.