Kryetari i Lëvizjes Qytetare “Odgovor”, Boban Bogdanoviq, ka njoftuar se është intervistuar nga Agjencia Informative e Sigurisë së Serbisë (BIA).
Ai ka theksuar se shkak i intervistimit ishte mbështetja e tij për Kosovën në rrugën drejt integrimeve euroatlantike, si dhe pajtimi për bashkëjetesën e serbëve dhe shqiptarëve në Kosovë.
Bogdanoviq gjithashtu është shprehur se supozon se do të arrestohet në Serbi nëse vazhdon me politikën e paqes ndërmjet Kosovës dhe Serbisë, duke avokuar për integrimin e tyre në NATO.
“Tema e bisedës ishte mbështetja ime për Kosovën në rrugën drejt integrimeve euroatlantike, pajtimit për bashkëjetesën e serbëve dhe shqiptarëve në Kosovë. Unë supozoj se do të arrestohem në Serbi nëse vazhdoj me politikën e paqes ndërmjet Kosovës dhe Serbisë dhe duke avokuar për integrimin e tyre euroatlantik dhe anëtarësimin në NATO”, ka shkruar ai në Twitter.
Ndër të tjera, ai ka theksuar se i është paraqitur se aktivitetet e tij janë në kundërshtim me Kushtetutën e Serbisë, ndërsa ai e ka kundërshtuar duke theksuar se nuk po shkel Kushtetutën e Kosovës.