Gjatë vizitës së tij të parë në Kosovë, presidenti i FIFA-s, Gianni Infantino, është takuar me presidenten e Kosovës, Vjosa Osmani dhe kryeministrin e Kosovës, Albin Kurti.
Përmes një postimi në Facebook, Osmani ka treguar se pret mbështetje të mëtejshme nga FIFA.
“Në fillim të mandatit të z.Infantino, Kosova u bë anëtarja e 210-të e FIFA-s me një kontribut të jashtëzakonshëm të tij si dhe me punën e palodhshme të ikonës së futbollit kosovar, Fadil Vokrri. Sot sporti kosovar kudo në botë ka paraqitje dinjitoze. Presim mbështetje të mëtejme nga FIFA që sportistëve tanë t’u sigurohet infrastrukturë më e mirë, e ata të shkëlqejnë duke treguar potencialin e vërtetë të Kosovës”, ka shkruar Osmani.
Krahas presidentes, Infantino ka takuar edhe kreun e ekzekutivit, Albin Kurti. I pari i futbollit botëror ishte i shoqëruar nga presidenti Agim Ademi, presidenti i FSHF-së, Armand Duka, presidenti i FFM-së, Muamet Sejdini, si dhe delegacioni i FIFA-s, Mattias Grafstrom, zv/sekretar i përgjithshëm, Alasdair Bell, zëvëndëssekretari i përgjithshëm i administratës, Youri Djorkaeff, këshilltar i lartë i futbollit dhe Federico Raviglione, menaxher i zyrës së presidentit.
Në mëngjesin e së premtes, Infantino është pritur në aeroportin “Adem Jashari” në Prishtinë nga presidenti i Federatës së Futbollit të Kosovës, Agim Ademi.