Presidentja Vjosa Osmani të premten ka pritur në takim ministrin e Punëve të Jashtme të Polonisë, njëkohësisht edhe kryesues i OSBE-së.
Mediat janë lejuar të marrin pamje vetëm pak minuta, kurse takimi mes kryesuesit të OSBE-së, Zbigniew Rau, dhe presidentes Osmani është mbajtur me dyer të mbyllura.
Përveç takimit me presidenten Osmani, Ministri Rau do të takohet edhe me kryetarin e Kuvendit, Glauk Konjufca, zëvendëskryeministren dhe ministren e Punëve të Jashtme, Donika Gërvalla-Schwarz, si dhe me ministrin për Komunitete dhe Kthim, Goran Rakiq.
Zbigniew Rau do të takohet edhe udhëheqësit e Misionit të OSBE-së në Kosovë dhe me Grupin e Trajnuesve, grup ekspertësh të të drejtave të njeriut i themeluar nga OSBE.
Para se të përmbyllë vizitën e tij me një konferencë për media, e cila është planifikuar të mbahet prej orës 16:30 në ambientet e institucionit të Avokatit të Popullit, ai do të vizitojë Komisionin Qendror të Zgjedhjeve (KQZ), komision i mbështetur nga OSBE dhe Polonia.