Pas dy netëve të suksesshme, Prishtina Dance Festival vazhdon sonte me natën e tretë, duke sjellë në skenë artistë të rinj dhe emra të njohur të komunitetit të kërcimit.
Festivali ka mbledhur në Prishtinë artistë nga vende të ndryshme, duke krijuar një hapësirë ku ndërthuren stile, përvoja dhe kultura të ndryshme përmes artit të kërcimit.
Në natën e dytë, në skenë u ngjitën edhe një vëlla e motër shqiptarë nga Zvicra, të cilët përmes performancës së tyre sollën energji dhe përvojën artistike para publikut në Prishtinë.
Ata thanë se performimi në Kosovë ishte një emocion i veçantë për ta, duke theksuar lidhjen që vazhdojnë ta kenë me kulturën dhe komunitetin shqiptar, pavarësisht se janë rritur jashtë vendit.
“Për ne ishte një kënaqësi e madhe të performojmë në Prishtinë dhe të ndajmë artin tonë me publikun kosovar. Edhe pse jemi rritur në Zvicër, lidhja me kulturën dhe komunitetin shqiptar ka qenë gjithmonë e veçantë për ne”, u shprehën ata.
Ndërsa sonte, festivali hyn në natën e tretë, duke vazhduar programin me performanca të tjera dhe artistë të ndryshëm.
Prishtina Dance Festival po e shndërron kërcimin në një pikë takimi për artistë dhe publikun, duke sjellë në Prishtinë një atmosferë të veçantë artistike.
