Të martën, shtatë komisione parlamentare në Kuvendin e Kosovës do të zhvillojnë mbledhjet e tyre, ku në rend dite dominojnë miratimi i planeve të punës për sesionin pranveror, si dhe shqyrtimi i disa projektligjeve me rëndësi.
Në orën 10:00, njëkohësisht do të mblidhen Komisioni për Arsim, Shkencë dhe Teknologji, Komisioni për Mbikëqyrjen e Agjencisë së Kosovës për Inteligjencë, si dhe Komisioni i posaçëm për shqyrtimin e kandidatëve për emërim në Gjykatën Kushtetuese.
Po në këtë orar, dy komisionet e para do të trajtojnë kryesisht çështje procedurale dhe organizative, përfshirë miratimin e rendit të ditës, procesverbaleve dhe shqyrtimin e planit të punës për pranverë.
Në orën 11:00, do të mblidhen Komisioni për Ekonomi, Industri, Ndërmarrësi, Tregti dhe Inovacion, si dhe Komisioni për Çështje të Sigurisë dhe Mbrojtjes.
Ndërkohë, në orën 11:30, Komisioni për Kulturë, Turizëm dhe Sport do të shqyrtojë në parim projektligjin për Lojërat Mesdhetare “Prishtina 2030”, krahas planit të punës për këtë vit.
Në orën 13:00, Komisioni për Mjedis, Ushqim, Bujqësi, Pylltari, Zhvillim Rural, Infrastrukturë dhe Transport do të trajtojë disa projektligje me ndikim të drejtpërdrejtë në mjedis dhe zhvillim.
Në mesin e tyre janë projektligji për inspektoratin qendror të mjedisit, ai për financimin e menaxhimit të resurseve ujore, si dhe projektligji për banim social dhe të përballueshëm.