Prokuroria Themelore në Prishtinë u ka bërë thirrje të gjitha vajzat dhe gratë që janë të dëmtuara në rastin e “Albkings” të reagojnë duke paraqitur veten në stacionet policore më të afërta të vendbanimit të tyre.
Në këtë rast, grupi “Albkings” ka shpërndarë video dhe fotografi intime të tyre, si dhe të dhëna personale të tjera.
“Prokuroria Themelore në Prishtinë iu bën apel të gjitha të dëmtuarave në rastin e “Albkings”, përmes së cilit grup iu janë shpërndarë video dhe fotografi intime të tyre, si dhe të dhëna të tjera personale, të mos hezitojnë e të paraqiten në stacionet policore më të afërta të vendbanimit të tyre, në mënyrë që të bashkëpunojnë ngushtë me organet e rendit, pasi synimi kryesor i Prokurorit të Shtetit është luftimi i suksesshëm i krimit, sigurimi i sundimit të ligjit, si dhe sjellja e kryerësve të veprave penale para drejtësisë”, thuhet në njoftimin e Prokurorisë.
Siç thuhet në njoftim, Prokuroria Themelore në Prishtinë është në koordinim të plotë me Policinë e Kosovës për të trajtuar rastin e “Albkings”.
Gjykata Themelore në Prishtinë tashmë ka vendosur të caktojë masën e paraburgimit për të pandehurin E.N, pasi dyshohet se ka ofruar dhe shpërndarë pa autorizim fotografi dhe video intime të individëve nëpërmjet rrjeteve sociale, me qëllime të prostitucionit.
Personi në fjalë, administrator i grupit “Albkings” u arrestua më 16 prill dhe më pas ishte ndaluar për 48 orë pas zbatimit të masave të fshehta teknike të hetimit dhe vëzhgimit nën dyshimin për kryerjen e veprës penale – Vjedhja e identitetit dhe kredencialeve.