Prokuroria Themelore në Prishtinë ka njoftuar se këngëtari i njohur Gjesti është ndaluar për 48 orë, pasi dyshohet për kryerjen e disa veprave penale, përfshirë mbajtje të paautorizuar të armëve, kanosje dhe dëmtim të pasurisë.
“Prokuroria Themelore në Prishtinë, Departamenti i Përgjithshëm, njofton opinionin publik, se me urdhër të Prokurorit Kujdestar është ndaluar për 48 orë një (1) person, për shkak të dyshimit të bazuar se i njëjti ka kryer veprat penale: ‘’Mbajtja në pronësi, kontroll ose posedim të paautorizuar të armëve’’ sipas nenit 366 të Kodit Penal të Republikës së Kosovës, për veprën penale ‘’Kanosja’’ sipas nenit 181 të KPRK-së, si dhe veprën penale ‘’Asgjësim apo dëmtimi i pasurisë’’ në bazë të nenit 321 të KPRK-së”, thuhet në njoftim.
Prokurori i Shtetit, në bashkëpunim me Policinë e Kosovës, po kryen hetimet e nevojshme lidhur me rastin.
Për shkak të fazës së hershme të procedurës hetimore, nuk janë dhënë detaje të tjera për momentin.
Prokuroria ka bërë të ditur se brenda afateve ligjore do të vendosë për masat e mëtejshme në përputhje me Kodin e Procedurës Penale të Kosovës.