Prokuroria Themelore në Mitrovicë ka kërkuar caktimin e masës së paraburgimit nga Gjykata kompetente në Mitrovicë ndaj shtetasit të Serbisë, i cili ishte arrestuar të martën në fshatin Jashanicë të Leposaviqit, pasi iu gjetën mbi 6 mijë fishekë në veturën e tij.
Këtë e ka bërë të ditur për Portalin Dukagjini zëdhënësi i Prokurorisë Themelore në Mitrovicë, Valon Preteni.
Preteni ka bërë të ditur se ai dyshohet për veprën penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse”.
“Prokuroria Themelore në Mitrovicë ka paraqitur pranë gjykatës kërkesën për caktimin e paraburgimit për personin e arrestuar, për shkak të dyshimit të bazuar për kryerjen e veprës penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse”.
Ndryshe, të martën e 21 shkurtit, një serb është arrestuar në fshatin Jashanicë të Leposaviqit, në një pikë kontrolli të Policisë-Kufitare në Veri.
Policia ka ndaluar automjetin me targa të Serbisë që po e drejtonte një mashkull serb, të cilit i kanë gjetur afro 6 mijë e 300 copë fishekë.
Të njëjtin e kanë shoqëruar në polici dhe pas intervistimit i është inicuar rasti penal dhe është dërguar në mbajtje deri në 48 orë.
Arrestohet një serb në veri, i konfiskohen mbi gjashtë mijë fishekë