Paris Saint-Germaini ka vazhduar dominimin ndaj Liverpoolit në Ligën e Kampionëve, duke marrë një fitore të rëndësishme 2:0 në ndeshjen e parë çerekfinale të zhvilluar në “Parkun e Princave”.
Skuadra e drejtuar nga Luis Enrique e nisi fuqishëm takimin dhe kaloi në epërsi shumë herët. Në minutën e 11-të, Desire Doue realizoi për 1:0, rezultat me të cilin u mbyll edhe pjesa e parë.
Në pjesën e dytë, PSG-ja vazhdoi dominimin dhe e dyfishoi epërsinë në minutën e 65-të, kur Khvicha Kvaratskhelia shënoi për 2:0.
Pavarësisht rezultatit, francezët kontrolluan plotësisht lojën, duke mbajtur 70 për qind të posedimit të topit dhe duke krijuar 18 raste, ndërsa Liverpooli u kufizua vetëm në tri tentativa.
Me këtë fitore, PSG bën një hap të madh drejt gjysmëfinales, por gjithçka mbetet e hapur para ndeshjes së kthimit që zhvillohet të martën e ardhshme në “Anfield”, ku Liverpooli do të kërkojë përmbysjen.