Gara evropiane e muzikës “Eurovision” këtë vit do ta ketë sloganin “Të bashkuar rreth muzikës”, derisa logoja e festivalit përmban zemra, të cilat rrahin së bashku.
Sipas BBC-së, kjo reflekton origjinën e garës, e cila ishte krijuar si një eksperiment transmetues për ta bashkuar Evropën.
Këtë vit, festivali do të zhvillohet në Britani të Madhe, saktësisht në Liverpool, për shkak të rrethanave të pasigurisë në Ukrainë, e cila e fitoi garën në vitin 2022.
Dy ngjyrat e flamurit të Ukrainës janë përdorur si inspirim për ngjyrën e logos për këtë vit.
Një ceremoni zyrtare e dorëzimit, e organizuar nga Rylan Clark dhe AJ Odudu, do të transmetohet nga salla e St George’s në Liverpool në orën 19:00 sipas kohës lokale, të martën në BBC Two.
Shumica e vendeve pjesëmarrëse do të zbulojnë gjithashtu se në cilën gjysmëfinale do të konkurrojnë.
Gjysmëfinalet më 9 dhe 11 maj do të shohin 31 garues përpara finales së madhe, e cila do të mbahet më 13 maj.
Britania e Madhe, Franca, Spanja, Gjermania dhe Italia janë automatikisht të kualifikuara për finale. Edhe Ukrainë, po ashtu, shkon drejt në finale, për shkak se vitin e kaluar e ka fituar garën.