Një person në Gjilan ka pësuar lëndime të rënda trupore pasi dyshohet se u rrëzua nga një lartësi teksa po punonte në një objekt ndërtimi.
Rastin e ka konfirmuar zëdhënësi i Policisë për rajonin e Gjilanit, Ismet Hashani.
Sipas tij, i lënduari është dërguar me urgjencë në Spitalin Rajonal të Gjilanit për trajtim mjekësor. Hashani bëri të ditur se Policia e Kosovës është njoftuar për incidentin më 16 mars 2026 në orët e paradites dhe menjëherë ka dalë në vendin e ngjarjes.
Në koordinim me Prokurorinë janë nisur hetimet për të sqaruar rrethanat e këtij rasti. Ndërkohë, Prokurori i Shtetit ka urdhëruar hapjen e rastit për veprën penale “asgjësim, dëmtim apo heqje të masave mbrojtëse në punë”, me qëllim zbardhjen e shkaqeve që çuan në incident.