Paneli Zgjedhor për Ankesa dhe Parashtresa (PZAP), ka miratuar ankesën e Lidhjes Demokratike të Kosovës, duke ndryshuar vendimin e mëparshëm të Komisionit Qendror të Zgjedhjeve për organizimin e qendrave të votimit jashtë vendit për zgjedhjet parlamentare të 28 dhjetorit.
Sipas vendimit, qendrat e votimit jashtë Kosovës do të vendosen vetëm në përfaqësitë diplomatike të Republikës së Kosovës dhe në hapësirat e tyre, duke hequr mundësinë e përdorimit të lokacioneve alternative që parashiheshin në vendimin e KQZ-së të datës 26 nëntor.
“Pranohet e bazuar ankesa e datës 27.11.2025 e parashtruar nga Lidhja Demokratike e Kosovës. Ndryshohet vendimi Nr.01/3438-2025 i KQZ-së sa i përket qendrave të votimit jashtë Kosovës, numrit të vendvotimeve dhe listës së tyre, ashtu që qendrat e votimit jashtë Kosovës caktohen përfaqësitë diplomatike të Republikës së Kosovës apo hapësirat e tyre.”
PZAP thekson se vendimi është marrë me shumicë votash, ndërsa në arsyetim theksohet se KQZ kishte tentuar të impononte “një formë të re” të organizimit të votimit jashtë vendit, që sipas panelit favorizonte subjektin që e kishte propozuar atë model.
