Shtëpia në Beverly Hills e superyllit të muzikës pop Rihanna është qëlluar me armë zjarri, kanë bërë të ditur autoritetet.
Policia nga Los Angeles Police Department ka reaguar pas raportimeve për të shtëna me armë rreth orës 13:15 sipas kohës lokale të dielën. Një i dyshuar është gjetur dhe është marrë në paraburgim.
Një zyrtar i policisë i tha partnerit amerikan të BBC-së, CBS News, se shtëpia e shënjestruar i përket Rihanna-s. Nga incidenti nuk raportohet për të lënduar.
Sipas një burimi të zbatimit të ligjit që foli për Los Angeles Times, këngëtarja ndodhej në vilë në momentin kur ndodhi incidenti.
Në shtator të vitit të kaluar, artistja solli në jetë fëmijën e saj të tretë, një vajzë, me partnerin A$AP Rocky. Çifti ka edhe dy djem, Riot dhe RZA, ndërsa shtatzëninë e fundit Rihanna e bëri publike gjatë Met Gala vitin e kaluar, raporton BBC.
Lajmi për foshnjën nuk ishte hera e parë që çifti bëri bujë në vitin 2025. Në shkurt, A$AP Rocky u shpall i pafajshëm për akuzën se kishte qëlluar me armë ndaj një ish-miku. Gjatë gjyqit, Rihanna kishte marrë me vete në gjykatë edhe dy djemtë e tyre.
Artistja me origjinë nga Barbados, emri i vërtetë i së cilës është Robyn Fenty, u bë e famshme në fillim të viteve 2000 me hitet si Pon de Replay dhe Umbrella. Së fundmi ajo ka shënuar 20 vjet nga publikimi i albumit të saj të parë.
Gjatë kësaj kohe, Rihanna ka krijuar edhe disa biznese të suksesshme, përfshirë linjën e kozmetikës Fenty Beauty dhe një kompani të brendshmeve. Pasuria e saj vlerësohet nga Forbes në mbi një miliard dollarë.