Kryetari i Aleancës për Ardhmërinë e Kosovës (AAK), Ramush Haradinaj, ka thënë se Dita Ndërkombëtare e Punës e gjen Kosovën në pozitën më të vështirë në 24 vitet e fundit.
“Secilën ditë që kalon, vendi ynë është edhe më keq, punëtorët tanë më të diskriminuar, e qeveria edhe më e fjetur”, ka thënë ai.
Sipas tij, kryeministri Albin Kurti dhe kabineti i tij qeveritar janë të fokusuar më shumë në grumbullimin e parave në thesarin e shtetit sesa në investime kapitale – “aty ku hapen vende të reja pune, rriten rrogat dhe zhvillohet shteti”.
“Fuqia punëtore po ik çdo ditë, vendi ynë po mbetet pa mjekë, pa inxhinierë, ekonomistë e pa mësimdhënës. Kosova rrezikon të mbetë edhe pa pjesëtarë të sigurisë sepse rinia po ik! Ngritja e çmimit të tatimit në pronë, afatizimet dhe lojërat me pagesa të tatimit, duhet të anulohen dhe të mendohet edhe për qytetarët”, ka shkruar ai në rrjetin social Facebook.
Ndër të tjera, kreu i AAK-së i ka bërë thirrje qeverisë që të rrisë pagat në sektorin publik, të gjejë mënyra për rritjen e pagave në sektorin privat, ku siç ka thënë ai, “inflacioni është goditja më e madhe, si dhe më e rëndësishmja të zhbllokojë buxhetin e shtetit”.
Në Kosovë, 1 Maji shënohet si një ditë e lirë nga puna dhe është një ditë për t’i festuar arritjet dhe kontributet e punonjësve në shoqëri.
Megjithatë, si jo rrallëherë, punonjësit do të shënojnë me protestë.
Kryetari i Federatës Sindikale të Sektorit Privat në Kosovë, Jusuf Azemi, për Dukagjinin ka thënë se Kosova tashmë ka nisur të ketë vështirësi për të gjetur punëtorë, ndërsa së bashku me ekonomistin Naim Huruglica, pajtohen se zëvendësimi i tyre me robotë është i vështirë dhe nuk mund të arrihet në një kohë të afërt.