Kryeministri i Shqipërisë, Edi Rama, ka thënë se qeveria e udhëhequr nga ai, është duke e përgatitur një rezolutë për Kuvendin e Shqipërisë, të cilën më pas do ta dërgojë para Këshillit të Evropës.
Rama ka konstatuar se situata është shumë shqetësuese sepse sipas tij, Gjykata Speciale ishte themeluar më qëllimin që t’iu përgjigjet akuzave të Dick Martyt. Sipas tij, aty nuk ka asgjë të bëjë më ato akuza apo me trafikim organesh.
Ai ka thënë se Këshill i Evropës(KiE), ka qenë i ndikuar nga propaganda ruse.
“Unë do të shkoj personalisht në Strasburg për t’iu drejtuar Këshillit të Evropës (KiE), pasi raporti i Dick Marty ishte i pabazuar për të akuzuarit në Hagë”, ka thënë Rama.
Tutje, Rama ka thënë se këtë do ta bëjë pasi Ambasadori rus në Këshillin e Sigurimit, përsëri kishte përmendur trafikimin e organeve.
Ndërsa “në aktakuzën për krerët e Ushtrisë Çlirimtare të Kosovës, nuk ka asnjë fakt me atë që kishte pretenduar raporti i Dick Marty-t”.
Sipas tij, kjo çështje meriton vëmendje, dhe nëse dikush nuk dëshiron të përgjigjet, të paktën bota duhet ta dëgjojë se ai raport ishte i pabazuar, dhe gjykata nuk e ka asnjë aktakuzë për trafikim organesh.