Komuna e Prishtinës ka nisur fazën e tretë të ndërtimit të rrugës “Bajram Bahtiri”, një ndër projektet më të rëndësishme infrastrukturore për zonën lindore të kryeqytetit, që lidh fshatrat e Gollakut me pjesën urbane të Prishtinës. Kjo është bërë e ditur nga kryetari i Komunës, Përparim Rama, i cili përmes një postimi në rrjetin social Facebook ka njoftuar se projekti është duke u realizuar me standarde të larta ndërtimi.
Rruga “Bajram Bahtiri” përfaqëson një arterie kyçe për lëvizjen e banorëve të shumë fshatrave që shtrihen në pjesën lindore të territorit komunal, dhe ndërtimi i saj është konsideruar prej kohësh si një nevojë e ngutshme për përmirësimin e qasjes dhe sigurisë në këtë zonë.
Faza e tretë e projektit përfshin:
Zgjerimin e rrugës në tri korsi, Ndërtimin e trotuareve për këmbësorë, Vendosjen e ndriçimit publik, dhe Investime në sistemin e ujësjellësit dhe kanalizimit
“Kjo nuk është vetëm një rrugë, është një angazhim për një jetë më të mirë për banorët e kësaj zone dhe një lidhje më funksionale mes fshatrave të Gollakut dhe qytetit”, ka shkruar Rama në postimin e tij.
Sipas tij, investimi i bërë në këtë projekt nuk ka vetëm karakter infrastrukturor, por është pjesë e një vizioni më të gjerë për zhvillimin e barabartë të të gjitha zonave të Prishtinës, përfshirë ato rurale që për shumë vite kanë mbetur jashtë hartës së investimeve serioze.