Kryeministri i Shqipërisë, Edi Rama, ka shpërndarë sot fjalimin e së premtes që ka mbajtur në sesionin e 79-të të Asamblesë së Përgjithshme të Kombeve të Bashkuara në New York.
Rama kishte thënë se Kosova është pjesë e pandashme e realitetit ndërkombëtar dhe se krahasimet me Ukrainën nuk qëndrojnë.
“Ja si flet një tradhtar i vërtetë i Kosovës, i cili me këtë rast iu dërgon të fala vëllazërore krejt atyre që prej Kosove, e shajnë me nanë e me babë si ‘vëllaun e Vuçiqit’”, ka shkruar Rama, sot në “Facebook”.
Ndër tjerash, Edi Rama në New York ka thënë se Kosova nuk duhet të mbahet peng nga askush me pretendime të rreme e se kjo duhet të fillojë nga pesë shtetet anëtare mosnjohëse.
“Në rajonin tonë, pas më shumë se çerek shekulli plagët nga shpërbërja e ish-Jugosllavisë kanë nevojë të shërohen, por kemi parë përparim”, deklaroi Rama.
Rama shtoi se bindja e palëkundur e Shqipërisë është të shohë të shkuarën me sytë e së ardhmes dhe një të ardhmen me sytë e së shkuarës.