Analisti politik, Sadri Ramabaja, vlerëson se kryeministri në detyrë, Albin Kurti, ka bërë të pamundurën të mundur përsa i përket veriut të Kosovës.
Ramabaja, në “Debat Plus” u shpreh se sovraniteti në veri është rikthyer teksa sipas tij këtë nuk ka arritur ta bëjë asnjë qeveri deri tani.
“Politika nganjëherë duhet të bëhet arti të pamundshmes sepse rikthimi shtrirja e sovranitetit në 16-17% të territorit të Kosovës që të gjitha qeveritë e mëparshme të Kosovës e kishin konsideruar të humbur madje mua një ish-këshilltar i Bajram Rexhepit ma kishte thënë në zyrën e tij ma ka thënë se ‘e kemi humbur pasi nuk kemi qenë në gjendje të vdesim për Kosovën ashtu siç e kishim trumbetuar’. Veriun e kanë dorëzuar ata që s’kanë qenë as të gatshëm të vdesin e as të sakrifikojnë dhe thoshin se është realitet ndarja e Mitrovicës”, u shpreh Ramabaja.
Ramabaja, mes tjerash, u shpreh se sipas tij Kurti do të mbahet mend për rikthimin e veriut.
“Të bërit të mundur të të pamundurës – kjo është e reja dhe ky fakt përmbys të gjitha paradigmat e mendimit politik të tabluar në Kosovë që nga vitet e 90-ta. Ai (Kurti) tha se është i kënaqur që 16 përqind e sovranitetit është rikthyer sepse ishte e pamundur shtrirja e sovranitetit atje dhe të ndalohej referendumi i Serbisë”, u shpreh Ramabaja.