Gjyqtarja Nushe Kuka – Mekaj do të vazhdojë të kryesojë trupin gjykues në rastin e njohur si Brezovica.
Kryetari i Gjykatës Themelore në Pejë, Armend Berisha, ka refuzuar kërkesën e prokurorit Rasim Maloku, që e njëjta të përjashtohet nga ky rast.
Maloku e kishte kërkuar këtë në seancën e mbajtur në maj, me arsyetimin se Besnik Berisha si mbrojtës ka konflikt interesi.
Këtë ai e kishte bazuar në faktin se Berisha në rastin Brezovica mbron Arben Çitakut, ish-sekretarin e Ministrisë së Mjedisit, por është edhe avokat i djalit të gjykatëses në një rast tjetër ku ai akuzohet për veprën penale detyrimi.
Në arsyetimin e këtij aktvendimi thuhet se kërkesa është refuzuar në mungesë argumentimi se në këtë rast ka konflikt interesi.
“Kryetari vlerëson se fakti se mbrojtësi i të pandehurit në këtë çështje penale është njëkohësisht edhe mbrojtës i djalit të gjyqtares në një çështje tjetër penale, nuk nënkupton se gjyqtarja ka interes privat që mund të ndikojë në anshmërinë dhe objektivitetin e saj, duke e ditur qartë se cilat janë detyrat dhe autorizimet e mbrojtësit në procedurë penale, shtrohet pyetja se çfarë interesi privat do të kishte gjyqtarja që të ndikoj që në këtë procedurë penale të jetë e anshme dhe subjektive ndaj avokatit Besnik Berisha, i cili në një procedurë krejtësisht tjetër penale është angazhuar dhe paguhet nga djali i saj për mbrojtje dhe përfaqësim të tij, detyra këto të cilat i njëjti është i thirrur dhe i licencuar që t’i ushtrojë? Andaj në mungesë të argumentimit të ekzistimit të interesit privat, rrjedhimisht konfliktit të interesit të Kryetares së trupit gjykues në raport me avokatin Besnik Berisha, kryetari i Gjykatës vlerëson se se kërkesa për përjashtim të saj mbështetut në këtë pikë është e pabazuar…”, thuhet në aktvendimin e Gjykatës Themelore në Pejë.
Gjithashtu, në arsyetim të vendimit është marr parasysh edhe deklarata e gjykatëses Nushe Kuka – Metaj se nuk kishte kurrfarë kontakti me mbrojtësin e djalit të saj.
“Kryetari i gjykatës ka vlerësuar dhe analizuar edhe shkaqet për përjashtim fakultativ të gjyqtares nga gjykimi i kësaj çështje penale të paraparë me nenin 39, par.3 të Kodit të Procedurës Penale, mirëpo bazuar në deklarimet e gjyqtares se me avokatin i cili është mbrojtës i anëtarit të saj të familjes asnjëherë nuk ka kontaktuar për çështjen e anëtarit të saj të familjes të cilin e mbrojnë, si dhe nuk ka pasur asnjëherë kontakt qoftë në zyre apo jashtë zyrës, atëherë bazuar në këto deklarime të gjyqtares është vërtetuar se nuk ka rrethana që e vënë në dyshim paanshmërinë e gjyqtares në gjykimin e kësaj çështje penale. Andaj, edhe mbi këto baza është konstatuar se kërkesa për përjashtimin e gjyqtares është e pabazuar për faktin se me asnjë provë të vetme nuk është vënë në dyshim paanshmëria e gjyqtares.”, thuhet tutje në aktvendim.
Në lidhje me këtë vendim të Gjykatës së Pejës, nuk ka kthyer përgjigje prokurori Rasim Maloku.
Në rastin e njohur si Brezovica, të akuzuar për keqpërdorim të detyrës zyrtare, marrje ryshfeti, ushtrim ndikimi e armëmbajtje pa leje, janë ish-kryetari i komunës së Shtërpcës, Bratislav Nikoliq e 11 zyrtarë të tjerë të kësaj komune, si dhe ish-punonjës të Ministrisë së Mjedisit.