Zëdhënësja e NATO-s, Oana Lungescu, u ka bërë thirrje institucioneve të Kosovës që të depërshkallëzojnë menjëherë dhe ta zgjidhin situatën në veri përmes dialogut.
Reagimi i zëdhënëses së NATO-s ka ardhur pasi tensionet u ngritën sërish në veri të vendit, ku dje kryetarët e rinj u vendosën në zyra me asistimin e Policisë së Kosovës.
“U bëjmë thirrje institucioneve në Kosovë që të deeskalojnë menjëherë dhe u bëjmë thirrje të gjitha palëve që ta zgjidhin situatën përmes dialogut. @NATO_KFOR mbetet vigjilent dhe do të sigurojë një mjedis të sigurt dhe të sigurt”, shkruan Lungescu.
Ishte e premtja dita kur kryetarët e komunave të veriut të Kosovës, një ditë pas betimit të tyre, u futën në zyrat e tyre në komuna, nën shoqërimin e Policisë së Kosovës.
Një masë e tillë erdhi pasi banorët lokalë serbë kundërshtuan shkuarjen e tyre aty, në zyrat që dikur përdoreshin nga zyrtarë serbë.
Nën tensionet e situatës, protestuesit hodhën gurë, dogjën veturat e Policisë së Kosovës e njëherit, gjatë grumbullimit të tyre u dëgjuan të shtëna armësh. Këto veprime të tyre detyruan Policinë që të përdorte gaz lotsjellës dhe shok-bomba për t’i shpërndarë protestuesit.
Megjithatë, të gjithë kryetarët e komunave veriore arritën që me asistimin e Policisë të hynin brenda komunave.
Situatat e së premtes nxitën reagimet e ndërkombëtarëve, me ç’rast të njëjtit shprehën shqetësimet dhe kritikat e tyre ndaj atyre që i quajtën “masa të dhunshme”.