Procesi i numërimit të votave për deputetë dhe verifikimi i rezultateve për subjektet politike ka rifilluar sot në orën 16:00 në 11 komuna të Kosovës, pas ndërprerjes së përkohshme për shkak të festës së Vitit të Ri.
Zëdhënësi i Komisionit Qendror të Zgjedhjeve (KQZ), Valmir Elezi, ka bërë të ditur se Qendrat Komunale të Numërimit që kanë rifilluar punën janë në komunat: Prishtinë, Pejë, Prizren, Podujevë, Mitrovicë e Jugut, Gjakovë, Malishevë, Lipjan, Gjilan, Ferizaj dhe Suharekë.
Sipas Elezit, deri tani janë procesuar mbi 2,009 vendvotime nga gjithsej 2,557, që përbën më shumë se 78.57 për qind të vendvotimeve në nivel vendi. Ai ka shtuar se procesi i numërimit dhe verifikimit është përmbyllur tashmë në 27 komuna.
“Të enjten në 11 komuna ka rifilluar procesi i verifikimit të rezultateve të subjekteve politike nga formularët e plotësuar në vendvotime dhe numërimi i votave të kandidatëve për deputetë Qendrat Komunale të Numërimit, në të cilat ka rifilluar procesi, u takojnë këtyre komunave: Prishtinë, Pejë, Prizren, Podujevë, Mitrovicë e Jugut, Gjakovë, Malishevë, Lipjan, Gjilan, Ferizaj, dhe Suharekë. Numri i përgjithshëm i vendvotimeve të procesuara nga të gjitha Qendrat Komunale të Numërimit është mbi 2,009 nga 2,557 vendvotime apo më shumë se 78.57%”, ka njoftuar Elezi.