“Jam plotësisht dakord. Një tjetër incident shqetësues sigurie. Është mirë ta shohësh Policinë e Kosovës duke reaguar me hetime intensive për rastin. Sjellja e mundshme e keqe nga policia duhet të shqyrtohet si çdo rast tjetër. Viktimës i uroj shërim të shpejtë”.
Kështu ka reaguar ambasadori i Gjermanisë në Kosovë, Jorn Rohde, në lidhje me plagosjen në veri, ku nga arma e zjarrit ishte plagosur një person.
I fully agree. Yet another worrying security incident. It’s good to see that @Kosovo_Police reacted with extensively investigating the case. Possible misconduct by the police need to be scrutinized like any other. I wish the victim a speedy recovery. https://t.co/VqNBTSpXfC
— Ambassador Jörn Rohde (@GermanAmbKOS) April 12, 2023
Ambasadori gjerman u pajtua me reagimin e Bashkimit Evropian në Kosovë që dënoi incidentin, duke thënë se ishin të përfshirë edhe zyrtarë policorë.
Të martën, Policia e Kosovës ka bërë të ditur se ka suspenduar një polic, i cili dyshohet se është përfshirë në këtë plagosje dhe janë suspenduar tre zyrtarë të tjerë policorë të mundshëm të përfshirë në këtë rast.
Në lidhje me këtë rast, Policia e Kosovës kishte sqaruar se nuk ka qenë e përfshirë në asnjë rast të shkëmbimit të zjarrit apo “të gjuajtjes me armë zjarri ndaj asnjë grupi apo personi të caktuar”.
Raportimet e mediave serbe të cilat thonin se Policia e Kosovës është e përfshirë, sipas tyre nuk ishin të vërteta.
“Andaj edhe shkrimet, apo pyetjet e adresuara Policisë së Kosovës nga disa mediume serbe, se kinse Policia e Kosovës është përfshirë, apo në formën e pyetjes se a është përfshirë në gjuajtje me armë dhe plagosje të një personi te ura e Bistricë në komunë të Leposaviqit, ju informojmë dhe njëherit ritheksojmë se Policia e Kosovës, nuk është përfshirë në asnjë rast të shkëmbimit apo gjuajtjes me armë zjarri, në asnjë lokacion në veri të Kosovës, përfshirë edhe lokacionin e apostrofuar”, thuhej në njoftim.
Për këtë rast ka reaguar edhe ambasadori i ShBA-së në Kosovë, Jeff Hovenier dhe Zyra e BE-së në Kosovë.
“ShBA-të janë të shqetësuara për një incident në të cilin një serb i Kosovës u qëllua mbrëmë në Zveçan. Zyrtarët dhe institucionet e Policisë së Kosovës duhet të kryejnë një hetim të plotë dhe të besueshëm. Ne jemi thellësisht të shqetësuar nga mohimi fillestar i bërë pa kujdesin e duhur”, ka shkruar Hovenier.