Presidenti i Koresë së Jugut, Yoon Suk-yeol, ka urdhëruar një përpjekje gjithëpërfshirëse të shpëtimit dhe rimëkëmbjes pas të shirave të rrëmbyeshëm që shkaktuan përmbytje shkatërruese dhe rrëshqitje dheu që vranë të paktën 39 njerëz.
Numri i të vdekurve të hënën përfshinte 13 persona të gjetur të vdekur në një nënkalim të zhytur në qytetin qendror të Cheongju, në provincën veriore Chungcheong, raporton Al Jazeera.
Yoon, në kthimin e tij në Seul pas një udhëtimi në Ukrainë, thirri një takim brenda agjencisë për reagimin ndaj fatkeqësive dhe u bëri thirrje autoriteteve t’i bëjnë përpjekjet maksimale për t’i shpëtuar viktimat.
“Nuk ka asnjë mënyrë për të shtypur trishtimin tim. Lutem për shpirtrat e të vrarëve në shirat e dendur dhe u shpreh fjalë ngushëllimi familjeve të viktimave”, tha presidenti.
Yoon gjithashtu premtoi mbështetje për punën e rimëkëmbjes, duke përfshirë përcaktimin e zonave të prekura si zona të veçanta të fatkeqësive.
Koreja e Jugut, e cila është në kulmin e sezonit të saj të musonit veror, është goditur nga shirat e dendur që nga 9 korriku. Reshjet kanë shkaktuar përmbytje të mëdha dhe rrëshqitje dheu, kryesisht në rajonet qendrore dhe jugore të vendit.