“Pas një serie të gjatë terrori kundër serbëve në Kosovë, serbët po e mbrojnë vetën”
“Vuqici shpallë pushtimin”
“Policia e Serbisë arreston forcat speciale të shtetit të rrem të Kosovës”
Krejt kjo përmbajtje është shpërndarë lirshëm në rrjete sociale duke e shtrembëruar totalisht ngjarjen e sulmit terrorist serb kundër Policisë së Kosovës në Banjskë të Zveçanit.
Ato janë faqe dhe persona që videot i publikojnë kryesisht në gjuhën serbe.
Por në rastin e Banjskës audiencës së tyre u janë drejtuar edhe në gjuhën angleze.
E, pikërisht këtë dukuri e kanë vërejtur edhe ata që merren me verifikimin e lajmeve të publikuara.
Ky narracion tashmë është bërë i zakonshëm sipas platformës “Hibrid”, që është projekt për luftimin e dezinformimit.
“Për ngjarjet në veri ka pas shumë dezinformata dhe lajme të rreme prej anës së tyre saqë janë mundu me ndryshu të gjithë ngjarjen, duke i paraqitur edhe shqiptarët si terrorist e pikërisht këto narrativa janë të zakonshme në Serbi të cilat i trajtomë edhe në baza ditore”, ka thënë Bardh Dema.
Në ndërkohë, profesori i komunikimit po thotë se në këtë rast, institucionet e vendit e kanë çuar mesazhin e duhur tek audienca ndërkombëtare.
Njëra ndër rastet që përmend Alban Zeneli është shpërndarja e pamjeve në mediume ndërkombëtare ku shihen terroristët serbë duke ikur maleve.
“Institucionet tona kanë ofru fakte, dëshmi nga vendi i ngjarjes dhe kjo normalisht ka qenë shembull I mirë i përdorimit të medias dhe shpejtësisë së publikimit nga ana e institucioneve si dy nga komponentët për me ndërtu një narrativë për ngjarjen që ka ndodhë në Banjskë”, ka thënë Zeneli.
Pos në rrjete sociale, tendencë për të ndryshuar narrativen e ngjarjes kanë pasur edhe institucionalistët serb.
Ivica Daçiq, ministër i Punëve të Jashtme të Serbisë kishte thënë që video ku shihet Milan Radojciq në Banjskë është e vjetër dhe e xhiruar dimrit.