Gjatë kësaj të shtune, mijëra trupa ushtarake ruse janë tërhequr përballë një ofensive të ukrainasve në rajonin e Kharkiv-it. Tërheqja e trupave ushtarake ruse është konfirmuar edhe nga ministria ruse e Mbrojtjes, duke thënë se po forconte trupat e saj në rajonin lindor të Donetsk-ut.
Ky lajm është konfirmuar pasi zyrtarët ukrainas njoftuan për rimarrjen e Kupyansk-ut, vend i cili ishte një qendër logjistike dhe tranzite për trupat ruse që luftojnë në lindje.
Presidenti ukrainas, Volodymyr Zelensyy ka thënë se ushtria e vendit ka rimarrë “më shumë se tridhjetë vendbanime” në rajonin e Kharkiv-it, me njësi të Policisë Kombëtare që lëvizin, ndërsa forcat ruse janë dëbuar.
Instituti për Studimin e Luftës vlerëson se Ukraina ka rimarrë rreth dy mijë e 500 kilometra katrorë territor rreth Kharkiv-it, ndërsa forcat e Kiev-it mund të kenë çliruar Kupyansk-un dhe Izyum-in të shtunën, raporton yahoo.news.
Agjencia bërthamore e OKB-së ka rritur paralajmërimin e saj në lidhje me termocentralin bërthamor të Zaporizhzhia të Ukrainës, duke thënë se objekti së shpejti mund të humbasë energjinë dhe të mbyllë reaktorin e tij të fundit operativ pas granatimeve të vazhdueshme në zonë. “Kjo është një situatë e paqëndrueshme dhe po bëhet gjithnjë e më e pasigurt,” tha shefi i agjencisë.
Më tej, në një deklaratë në faqen e internetit të presidentit ukrainas thuhet se janë vendime për “sigurinë në vendbanimet e çliruara”, Zelenskyy gjithashtu ka folur edhe me presidentin francez Emmanuel Macron, ku shumë biseda janë fokusuar në termocentralin bërthamor të Zaporizhzhia.