Ushtria Ruse ka raportuar të premten se ka zhvilluar sulme me dronë në bazën detare më të madhe të saj në Detin e Zi dhe në Gadishullin e Krimesë, i cili ishte aneksuar ilegalisht nga Moska.
Si rezultat i sulmeve, autoritetet kanë ndaluar përkohësisht qarkullimin në një prej porteve më të mëdha komerciale të Rusisë.
Ministria ruse e Mbrojtjes ka deklaruar se dy dronë detarë sulmuan bazën e Novorosisk në Detin e Zi gjatë natës dhe se anijet ruse e kanë shkatërruar atë. Përveç kësaj, raportohet se janë rrëzuar edhe 13 dronë në Gadishullin e Krimesë.
“Anijet janë identifikuar dhe janë shkatërruar nga anijet ruse që e kanë ruajtur bazën”, ka thënë Ministria ruse përmes një deklarate.
Agjencia ruse e lajmeve RIA, e ka cituar guvernatorin e rajonit Krasnodar, Veniamin Kondratyev, të ketë thënë se nuk ka raportime për viktima dhe dëme nga sulmi në Novorosisk.
Po ashtu, në Gadishullin e Krimesë nuk është raportuar për viktima gjatë rrëzimit të 13 dronëve.
Kjo rritje e sulmeve ka ndodhur pas refuzimit të Rusisë për të vazhduar marrëveshjen e ndërmjetësuar nga Turqia dhe Kombet e Bashkuara që mundësonte transportin e grurit të Ukrainës përmes detit.
Ndërkohë, presidenti i Ukrainës, Volodymyr Zelensky, ka deklaruar se lufta në lindje të shtetit po përkeqësohet dhe është shumë mizore për popullin e tij. Sulmet e ushtrisë ruse po tentojnë të ndalojnë përparimin e forcave ukrainase, duke i shkaktuar vështirësi të mëdha.
“Pushtuesit janë duke tentuar t’i ndalojnë djemtë tanë në çdo mënyrë, Sulmet janë shumë mizore”, ka thënë Zelensky, duke shtuar se është “vështirë gjithandej”.
Lufta në Ukrainë ka filluar më 24 shkurt 2022 dhe presidenti rus, Vladimir Putin, e ka quajtur këtë si “operacion special ushtarak” për ta çmilitarizuar Ukrainën.
Ndërkohë që Rusia është ndeshur me sanksione të ashpra nga perëndimi për sjelljen e saj, konflikti ka shkaktuar vdekjen e mijëra njerëzve dhe zhvendosjen e miliona të tjerëve nga shtëpitë e tyre.