Sindikata e Bashkuar e Arsimit, Shkencës dhe Kulturës (SBASHK), në një komunikatë për media ka thënë se në 70 për qind të shkollave gjatë kësaj të shtune nuk është mbajtur mësimi.
Në komunikatë njoftohet se në pjesën tjetër të shkollave numri i nxënësve ka qenë i vogël dhe si rrjedhojë nuk mund të thuhet se është zhvilluar procesi mësimor.
Tutje në komunikatë të SBAShK-ut thuhet se kjo është vlerësuar në takimin e jashtëzakonshëm që SBAShK-u ka mbajtur me kryetarët e nivelit komunal sindikal, të cilët kanë raportuar lidhur me gjendjen e sotme në komunat e tyre.
Mes tjerash, në këtë komunikatë për media theksohet se SBAShK-u vlerëson që në fillim të javës së ardhshme MAShT-i duhet të mbajë takim urgjent me përfaqësues të Asociacionit të Komunave, të kolegjiumit të drejtorive komunale të arsimite, të Këshillit të Prindërve dhe SBASHK-ut për të bërë përpjekje të përbashkëta dhe për të arritur marrëveshje për orët e humbura në grevë.
Dhe nëse nuk veprohet kështu, SBAShK-u ka thënë se “atëherë do të kemi situatë të njëjtë edhe në të shtunat tjera e aq më shumë edhe në ditët e rregullta të punës, procesi mësimor nuk do të ketë rrjedhë të mbarë nga debatet që do të zhvillohen lidhur me çështjen e orëve e ditëve të humbura në grevë”.