Në vizitën e tij zyrtare në Kosovë, kancelari gjerman Olaf Scholz i pyetur për qëndrimin e tij ndaj Ballkanit të Hapur, nëse kjo nismë rrezikon marrëveshjet e Procesit të Berlinit, ai ka thënë se prioritet mbetet tregu i përbashkët rajonal.
“Prioritet të madh i japim tregut të përbashkët rajonal dhe duhet të përparojmë. Është e rëndësishme të arrihen përparimet që janë të arritshme. Te gjithë duan të shkojnë në BE dhe atje janë të vlefshme rregullat e lirisë së lëvizjes”, ka thënë Scholz.
Ndërsa kryeministri i Kosovës, Albin Kurti, për këtë çështje ka thënë “BE-ja është fati ynë, ne duam Ballkan Evropian pa orientime dhe formulime tjera për Ballkanin”.
Ndërsa, Scholz i pyetur për dialogun Kosovë-Serbi, ka thënë se do të bëhen përparime që të arrihet deri te zgjidhja e çështjes finale.
“Ka pasur takime edhe në Berlin. Të një pikë apo tjetër do të vijë edhe të përparimi, si i energjisë dhe çështje të tjera. Është diçka që në fund kërkohet edhe pragmatizëm që çështjet finale të zgjidhen”, ka thënë Scholz.
