Policia e rajonit të Prishtinës ka njoftuar se të enjten, në kuadër të punës parandaluese, janë ndërmarrë një sërë veprimesh hetimore dhe operative, të cilat në veçanti kanë rezultuar me gjetjen e armëve dhe municioneve si dhe identifikimin e poseduesve të tyre.
Në një komunikatë për media thuhet se në tri lokacione të ndryshme në Prishtinë, pas disa kontrolleve të ushtruara ndaj disa veturave dhe personave të dyshuar, policia ka arritur të gjejë dhe të sekuestrojë armë dhe municione.
“Janë sekuestruar një revole të tipit TT, e kalibrit 7.62 mm, një revole të tipit BERETTA, e kalibrit 9 mm, një revole të tipit Ecol aras, (armë me gaz) e kalibrit 9 mm, një revole të tipit Ecol voltran tuna, (armë me gaz) e kalibrit 6 mm, 33 copë fishekë të llojeve dhe kalibrave të ndryshëm, një thikë, si dhe një jelek antiplumb”, thuhet në komunikatë.
Të dyshuarit janë shoqëruar në stacionet përkatëse policore dhe ndaj tyre në konsultim me prokurorin e shtetit, policia ka iniciuar hetim në drejtim të veprës penale “Mbajtje në pronësi, kontroll ose posedim të pa autorizuar të armës” dhe të njëjtit i ka proceduar më tej.