Rexhep Selimi, fjalën e tij përfundimtare të mërkurën ka thënë se historia e Kosovës nuk mund të rishkruhet në një sallë gjyqi.
Selimi, para trupit gjykues në Hagë, u shpreh se Ushtria Çlirimtare e Kosovës, nuk ishte krijuar nga dëshira por nga nevoja dhe se armët për ta ishin mbijetesë, njofton Dukagjini.
“Serbia kurrë nuk e fshehu qëllimin e saj ndaj shqiptarëve. Prandaj pyes sërish: Çfarë duhet të bënim ne? Të prisnim radhën për t’u vrarë, apo të iknim nga shtëpitë tona? UÇK-ja nuk u krijua nga dëshira por nga nevoja. Për mua të qenit bashkëluftëtar i Adem Jasharit është nderi më i madh. Po, kam bartur armë. Armët për ne ishin mbijetesë. UÇK nuk kishte qëllim tjetër përveç lirisë. UÇK ishte ushtri çlirimtare”, ka thënë ai, raportoi KSP.
Ai tutje u shpreh i bindur se kanë bërë gjënë e duhur.
Selimi, mes tjerash, u shpreh se akuzat ndaj tij dhe shokëve të tij, janë të pabazuara dhe të padrejta.
“Nuk jam këtu për ta mbrojtur veten, sepse këtë gjë e bëjnë avokatët e mi, por ju duhet ta ushtroni drejtësinë. Prokuroria po mbështetet në pretendime që nuk kanë bazë dhe po bën përpjekje të vazhdueshme për ta njollosur luftën”, u shpreh Selimi.