Drizan Shala, ekspert i sigurisë, i ftuar në emisionin “Rreth e rrotull”, ka folur më shumë rreth çështjes së prishjes së antenave të radiokomunikimit në veri, duke thënë se shteti serb ka për qëllim cenimin e rendit kushtetues të Kosovës.
Sipas tij, kjo ndodhi është në vazhdimin e “luftës” që po bën Serbia ndaj Kosovës.
“Kjo është në vazhdën e luftës që është duke bërë Serbia, pra dëmtimi i antenës të komunikimit në pjesën veriore që e afekton pjesën veriore, është e qartë që në veri veprojnë struktura të specializuara të ndërlidhura me sistemin e sigurisë të shtetit serb që po pengojnë në çdo aspekt ta pengojnë shtrirjen e autoritetit zyrtar në atë pjesë,” u shpreh Shala
Moskomunikimin disa orësh, Shala e cilëson jo të mirë.
“Mbetja për dy-tri orë, mosqasja e komunikimit permanent në shumicën e rasteve, në të kaluarën kemi hasur pengesa të tilla ku policia dhe Ministritë e linjës kanë vepruar duke mundësuar që komunikimi të jetë permanent në atë pjesë dhe kështu të mundësohet komunikimi i shpejtë,” shtoi ai.
E një ndërprerje të tillë, Shala e quan të qëllimshme.
“Veprimet konkrete varen nga komunikimi, dhe një ndërprerje e tillë është faza e parë e parapërgatitjeve të akterëve të caktuar, qoftë shtetërorë apo jo shtetërorë të Serbisë që kanë një qëllim dhe një synim, cenimin e rendit kushtetues të Republikës së Kosovës.”