Eksperti i Sigurisë, Drizan Shala, ka vlerësuar se Kutia e Pandorës tashmë është hapur dhe se audio-incizimet e telefonatave të shefes së Grupit Parlamentar të LVV-së, Mimoza Kusari, me Slavko Simiq janë vetëm fillimi.
Në “FIVE” të RTV Dukagjini, Shala ka krahasuar këto publikime me “Watergate”.
“Këto përgjime janë vetëm fillimi i atyre që do të pasojnë, sepse është hapur Kutia e Pandorës, sepse hipotetikisht, çka do të ndodhë nëse do të dalin përgjimet në mes ministrit dhe komandantëve taktikë operativë të Policisë së Kosovës. Situata e Kusari-Lila është një “Watergate” për Kosovën, sepse do të dalin shumë qasje që nuk kanë qenë të njohura për opinionin publik dhe për simpatizuesit e LVV-së”, ka deklaruar ai.
Shala kujton një deklaratë të kreut të Aleancës për Ardhmërinë e Kosovës (AAK), Ramush Haradinaj, ku qeverisjen e Kurtit e konsideronte “të ndërtuar nga letrat”.
“Do të vije ajo që thoshte Haradinaj, ajo shtëpia prej kartonave do të bjerë”, ka deklaruar Shala.
Ky i fundit vlerëson se Kusari-Lila do të duhej të jepte dorëheqje nga pozita e saj, si shkak i shkeljeve etike dhe atyre profesionale.