Shanghai ka njoftuar se është duke ndërmarrë hapa të mëtejshëm drejt kthimit në jetën normale dhe heqjes së një bllokimi dymujor nga COVID-19 këtë javë. Ndërsa Pekini rihapi pjesë të transportit të tij publik, disa qendra tregtare, palestra dhe vende të tjera gjersa infeksionet u stabilizuan.
Nga e mërkurja, qendra tregtare kineze synon të përfundojë një bllokim që ka dëmtuar rëndë ekonominë dhe ka bërë që shumë banorë të Shangait të humbasin të ardhurat, të luftojnë për të gjetur ushqim dhe për të përballuar mendërisht izolimin e zgjatur.
Kufizimet e dhimbshme nga COVID-19 në qytetet kryesore kineze bien ndesh me tendencat që shihen në pjesën tjetër të botës, të cilat kanë lëvizur kryesisht drejt bashkekzistencës me virusin edhe kur infeksionet vazhdojnë të përhapen.
“Shanghai, qyteti më i populluar i Kinës, do të lehtësojë kërkesat e testimit nga e mërkura, për njerëzit që duan të hyjnë në zonat publike”, ka thënë zëdhënësja e qeverisë së qytetit Yin Xin, duke shtuar se këto ndryshime duhet të inkurajojnë rifillimin e punës.
“Situata aktuale epidemike në qytet vazhdon të stabilizohet dhe përmirësohet,” ka thënë Yin, duke shtuar se strategjia e Shangait tani “po lëvizte drejt parandalimit dhe kontrollit të normalizuar”.
Njerëzit që hyjnë në ambiente publike ose marrin transport publik duhet të tregojnë një test negativ PCR të marrë brenda 72 orëve, kundrejt 48 orëve më parë.
Shërbimet e autobusëve brenda Zonës së Re Pudong, shtëpia e aeroportit më të madh të Shangait dhe distriktit kryesor financiar, do të rifillojnë plotësisht deri të hënën, thanë zyrtarët.
“Plaza 66”, një qendër luksoze në qendër të Shangait që ka Louis Vuittonin dhe marka të tjera luksoze, u rihap të dielën.
Autoritetet kanë zbutur ngadalë kufijtë, me fokus në rifillimin e prodhimit.
Më shumë njerëz janë lejuar të largohen nga banesat e tyre dhe më shumë biznese janë lejuar të rihapen, megjithëse shumë banorë mbeten kryesisht të kufizuar në komplekset e tyre të banimit dhe shumica e dyqaneve mbeten të kufizuara në shërbimet e dërgesave.
Autoritetet miratuan 240 institucione financiare në qytet për rihapjen nga e mërkura, raportoi të dielën agjencia shtetërore “Shanghai Securities News”, duke shtuar një listë prej 864 firmash të lëshuara në fillim të këtij muaji.
Më shumë se 10,000 bankierë dhe tregtarë që kanë jetuar dhe punuar në zyrat e tyre që nga fillimi i bllokimit, janë kthyer gradualisht në shtëpi.
Shanghai ka lejuar tashmë prodhuesit kryesorë në industrinë e automjeteve, shkencat e jetës, kimikatet dhe gjysmëpërçuesit të rifillojnë prodhimin që nga fundi i prillit.