E ngarkuara me punë në Ambasadën e Shteteve të Bashkuara në Kosovë, Anu Prattipati, ka reaguar ndaj deklaratave të kryeministrit në detyrë, Albin Kurti, lidhur me Gjykatën Kushtetuese.
Prattipati ka shprehur zhgënjim për gjuhën dhe akuzat e përdorura nga kreu i Lëvizjes Vetëvendosje, duke paralajmëruar se një qasje e tillë rrezikon të përkeqësojë klimën politike në vend.
“Jemi të zhgënjyer nga veprimet dhe deklaratat e fundit të Kryeministrit në detyrë Kurti, të cilat kanë rritur paqëndrueshmërinë dhe pasigurinë në Kosovë. Këto veprime minojnë procesin politik, dobësojnë institucionet e Kosovës dhe përkeqësojnë tensionet ndëretnike.
Po e vlerësojmë me kujdes përgjigjen tonë, por më lejoni të jem e qartë: çdo veprim që dobëson stabilitetin politik dhe ekonomik është një sfidë serioze për partneritetin tonë”, ka potencuar diplimatja amerikane për Dukagjinin.
Reagimi i saj erdhi pak ditë pasi Kurti, në mbledhjen e Këshillit të Përgjithshëm të Vetëvendosjes më 7 shtator, e akuzoi Gjykatën Kushtetuese se funksionon si “hije politike e opozitës”.
Ai kritikoi vendimin e fundit të saj për të vendosur masë të përkohshme, të kërkuar nga Lista Serbe, e cila deri më 30 shtator ndalon procedurat për formimin e qeverisë së re.
Kurti argumentoi se Gjykata po vonon qëllimisht proceset, duke kujtuar se edhe në të kaluarën disa nisma të qeverisë së tij janë shpallur antikushtetuese. Ai e quajti këtë sjellje si “të dëmshme dhe absurde”, duke pretenduar se gjyqtarët aktualë janë produkt i vendimeve të partive që dikur ishin në pushtet.