Shefi i grupit mercenar rus Wagner, Yevgeny Prigozhin, ka shkaktuar bujë me një postim në Telegram, për atë që potencialisht mund të jetë fundi i luftës në Ukrainë.
Shumë media ukrainase i kanë kushtuar vëmendje pjesës së tekstit të 61-vjeçarit, në të cilin, është thënë se “Pushteti dhe shoqëria, sot duhet të vendosin ndalesë në operacionin special ushtarak”, transmeton agjencia e lajmeve dpa.
Edhe pas më shumë se një vit luftë, Rusia ende i referohet luftës në Ukrainë si “operacion special ushtarak”.
Prigozhin, i cili e ka postuar këtë tekst të premten në Telegram, ka shtuar se “varianti ideal do të ishte që të përfundonte operacioni special ushtarak dhe Rusia të shpallte se i ka arritur të gjitha synimet e planifikuara – dhe në njëfarë mënyrë i kemi arritur ato”.
Rusia e ka nisur luftën në Ukrainë në shkurt të vitit të kaluar, mirëpo nuk ka arritur të depërtojë në Kiev dhe qytete të tjera të mëdha.
Forcat ruse kanë pushtuar pjesë në lindje dhe jug të Ukrainës, përfshirë edhe Gadishullin e Krimesë, të cilin e kanë aneksuar më 2014.
“Për Rusinë, gjithmonë ekziston rreziku që situata në front të përkeqësohet pas nisjes së kundërofensivës”, ka shtuar Prigozhin.
Ekspertët presin që kundërofensiva ukrainase të nisë në javët në vijim.
Megjithatë, Prigozhin është deklaruar kundër negociatave që do të nënkuptonin heqjen dorë nga territoret ukrainase që tashmë i kanë pushtuar forcat ruse. REL