Shefja e UNMIK-ut, Caroline Ziadeh në prezantimin e raportit gjashtëmujor për Kosovën në Këshillin e Sigurimit të Kombeve të Bashkuara ka thënë se “që nga pranvera e kaluar ne të gjithë kemi qenë dëshmitarë të disa përshkallëzimeve në retorikën politike mes Prishtinës dhe Beogradit, por edhe të disa momenteve të tensioneve akute në terren.”
Këto tensione kërcënojnë të kthejnë prapa shumë gjëra të arritura tashmë përmes dialogut të mbështetur nga Bashkimi Evropian, ka thënë Ziadeh.
Sipas shefes së UNMIK-ut, kur punohet së bashku në mënyrë koherente dhe efektive mund të kontribuohet për të sqaruar keqkuptimet dhe për të shmangur përshkallëzimet që mund të ndodhin.
Ziadeh ka folur edhe për çështjen e liberalizimit të vizave për Kosovën.
“Qeveria e Kosovës mbetet e fokusuar në adresimin e çështjeve kritike në lidhje me sundimin e ligjit; përpjekje që presim të jenë vërejtur nga shtetet anëtare evropiane që peshojnë qëndrimet e tyre për liberalizimin e vizave dhe të udhëtimit për popullin e Kosovës. Bashkësia ndërkombëtare duhet të marrë pjesën e saj të përgjegjësisë për të mbështetur një të ardhme më të mirë për Kosovën. Qëllimi i UNMIK-ut është që të kontribuojë në efekte pozitive. UNMIK angazhohet për krijimin e mundësive për të promovuar atmosferë të të drejtave të njeriut”, tha ajo.
“Gjithashtu mund të ndihmojmë të fuqizojmë liderët vizioni i të cilëve i njeh dobitë e reduktimit të tensioneve, e jo i atyre që nxisin tensione. Ne do vazhdojmë te ofrojmë të gjithë mbështetjen e mundshme për suksesin e këtij dialogu”, ka shtuar ajo.
Në seancën e Këshillit të Sigurimit po merr pjesë edhe Zëvendëskryeministrja e Kosovës, njëherësh ministrja e Punëve të Jashtme të Kosovës, Donika Gërvalla-Schwarz, e cila do të prezantojë qëndrimet e Republikës së Kosovës.