Një shpërthim i fuqishëm i lëndës plasëse tritol ka ndodhur në orët e para të mëngjesit ne lokalin e reperit të njohur Noizy. Sipas raportimeve të para, lënda plasëse ishte e vendosur në lokalin e rap artistit në Durrës dhe shpërthimi ka ndodhur rreth orës 04:20 të mëngjesit.
Fatmirësisht, nuk ka pasur persona brenda ambienteve dhe të vetmet dëme të raportuara janë ato të xhamave në dy kate të ndërtesës. Policia gjendet ndërkaq në vendngjarje dhe po punon për zbardhjen e rrethanave.
Deri më tani, nuk dihen autorët që kanë vendosur lëndën plasëse, megjithatë dyshohet se është një vazhdim i konfliktit të ndodhur dy ditë më parë mes Noizyt dhe Cllevios.
Thuhet se sherri i tyre filloi pasi ky i fundit kishte folur kundër artistit në rrjete sociale dhe e kishte ofenduar. Gjithashtu, përleshja e tyre fizike ndodhi saktësisht në lokalin e Noizyt, aty ku edhe ka ndodhur shpërthimi me tritol.
Në dëshminë e parë të dhënë për Policinë e Shtetit, reperi ka deklaruar se problemet e vetme i ka me këngëtarin e të njëjtit zhaner muzikor, Cllevio-n.