Përafërsisht 18,000 lopë u vranë nga një shpërthim në një fermë qumështi në Teksas në fillim të kësaj jave. Shpërthimi në South Fork Dairy pranë qytetit të Dimmitt, la gjithashtu një person në gjendje kritike.
Autoritetet besojnë se makineritë në objekt mund të kenë ndezur gaz metan.
Gati tre milionë kafshë ferme ngordhën nga zjarret në të gjithë SHBA-në midis 2018 dhe 2021.
Zyra e Sherifit të Qarkut Castro tha se ata kishin marrë një raport për një zjarr në fermë rreth orës 19:21 të së hënës.
Fotot e postuara nga Zyra e Sherifit tregojnë një shtëllungë të madhe tymi të zi që ngrihet nga toka.
Kur policia dhe personeli i urgjencës mbërritën në vendngjarje, gjetën një person të bllokuar, i cili duhej të shpëtohej dhe të dërgohej në spital në gjendje kritike.
Ndërsa, shifra e saktë e lopëve që u vranë nga zjarri dhe tymi mbetet e panjohur, Zyra e Sherifit i tha BBC-së se një “18,000 krerë bagëti” ishin humbur.
Në një deklaratë dërguar BBC-së, Instituti i Mirëqenies së Kafshëve me bazë në Uashington DC, tha se – nëse konfirmohet – një numër i vdekjeve prej 18,000 lopësh do të ishte “deri tani” zjarri më vdekjeprurës i hambarëve që përfshin bagëti qëkur filloi të mbante statistika në 2013.
Sipas AWI, gati 6.5 milionë kafshë ferme janë vrarë në zjarret në hambar që nga viti 2013, nga të cilat, rreth 6 milionë ishin pula dhe rreth 7,300 ishin lopë.
Midis 2018 dhe 2021, gati 3 milionë kafshë ferme ngordhën nga zjarri, me 1.76 milionë pula të ngordhura në gjashtë zjarret më të mëdha gjatë asaj periudhe kohore.