Albana Krasniqi – Malaj, specialiste e politikave të migracionit në Zvicër, ka thënë se sipas Zyrës Federale të Statistikave, gjuha shqipe është gjuha më e folur në Zvicër pas gjuhës angleze.
“Sipas statistave, gjuha e parë e huaj që flitet dhe që nuk është gjuhë zyrtare është anglishtja, rreth 6 për qind të popullsisë…Ndërkohë, sipas të njëjtave statistikave, ka 292 mijë rezidentë, 3.4 për qind ia kemi kaluar portugezëve në 2023-in. Portugezët ishin ata që flisnin gjuhën e dytë më të folur në Zvicër”, ka thënë Krasniqi – Malaj në emisionin “Rreth e Rrotull”.
Ajo ka bërë të ditur se 292 mijë shqiptarë flasin gjuhën shqipe, vetëm 39 mijë shprehën në gjuhën rumoshe, e cila tashmë është një gjuhë zyrtare.
Më tej, specialistja u shpreh se mjafton të shkosh në spitale, farmaci, qendra komerciale për të parë se ka gjithandej shqiptarë që e flasin gjuhën shqipe në dialekte të ndryshme atje.
Krasniqi – Malaj ka theksuar se është edhe një aspekt tjetër që ka ndikuar në këtë gjë, por që nuk është i njohur.
“Në vitet e 90-ta shqiptarët e Shqipërisë shkonin në Greqi dhe Itali dhe tani kemi një fenomen social jashtëzakonisht shumë interesant. Tani kemi fazën e dytë të migracionit, shqiptarët që fillimisht janë vendosur në Greqi dhe Itali, për arsye të një komforti ekonomik më të madh vijnë dhe vendosen në Zvicër. Kjo është një popullsi e re që nuk ishte e njohur më përpara këtu”, ka treguar specialistja e politikave të migracionit në Zvicër.
Për më shumë, mund ta shikoni videon më poshtë: