Pas kërcënimit që i’u bë një mjeku në Klinikën e Kardiologjisë përgjatë orarit të punës, Shërbimi Spitalor Klinik dhe Universitar i Kosovës (SHSKUK), ka kërkuar që organet e drejtësisë të ndërmarrin masa ndaj kërcënuesit.
Përmes një komunikate për media, SHSKUK-ja ka thënë se aktet e tilla ndaj punëtorëve shëndetësorë në institucionet shëndetësore, janë të papranueshme, të dënueshme dhe të dëmshme.
“Ato e dëmtojnë rëndë imazhin dhe dinjitetin e mjekut, por e dëmtojnë edhe ofrimin e shërbimeve shëndetësore cilësore për gjithë qytetarët e Kosovës. ShSKUK kërkon nga organet e drejtësisë të merren me rastin në fjalë dhe ndaj kërcënuesit të ndërmerren masa konform legjislacionit në fuqi”, shkruhet në reagim.
OMK njofton se doktori i kardiologjisë u sulmua në vend të punës
OMK janë shprehur të zhgënjyer kur janë njoftuar për sulmin ndaj specialistit, pasi ai u sulmua në vend të punës gjersa po ofronte shërbimin shëndetësor, sipas tyre sulmet ndaj stafit janë bërë pjesë e protokollit të sjelljes së shërbimmarrësve nëpër institucione shëndetësore.
“Ndërkaq, shqetësues mbetet fakti që institucionet përgjegjëse, sidomos ato të ndjekjes penale me pasivitetin e tyre janë duke i stimuluar këto sulme që tanimë janë bërë fenomen ditor”, thuhet në reagimin e OMK-së.
Ndër të tjera, OMK-ja ka kërkuar të ndërmirren veprime nga Prokurori i Shtetit, gjykatat, si dhe autoriteteve të tjera.