Protestat kundër kryetarëve shqiptarë të sapozgjedhur të komunave me shumicë serbe Zveçan, Zubin Potok dhe Leposaviq, janë duke vazhduar edhe këtë të martë.
Objektin e komunës së Zubin Potokut janë duke e siguruar Policia e Kosovës. Po ashtu, edhe brenda janë edhe njësitet speciale të Policisë së Kosovës.
Në komunën e Zveçanit rreth 30 serbë janë grumbulluar para objektit komunal.
Ndërkohë, siç ka raportuar ekipi i terrenit të RTV Dukagjini, në Leposaviq janë grumbulluar rreth 100 protestues dhe u janë afruar trupave të KFOR-it.
Një ditë më herët, ushtarët e KFOR-it u përleshën me protestues serbë që refuzuan t’i binden thirrjes së misionit paqeruajtës për t’u larguar nga hapësira pranë komunës së Zveçanit.
Së paku 25 ushtarë të KFOR-it u plagosën, ashtu si edhe dhjetëra protestues.